ភ្នំពេញ៖ ក្រសួងសុខាភិបាលបានប្រកាសហាមឃាត់គណនីបណ្តាញសង្គមហ្វេសប៊ុកឈ្មោះ អិល អេន អេ LNA Boutique កំពុងផ្សព្វផ្សាយលក់ផលិតផលឱសថ WARTRE MOVER OINTMENT គ្មានលេខបញ្ញិកាពីក្រសួងសុខាភិបាល។

ក្រសួងសុខាភិបាល បានអះអាងថាម្ចាស់ហ្វេសប៊ុក Facebook គណនីឈ្មោះ អិល អេន អេ LNA Boutique បានកំពុងផ្សព្វផ្សាយលក់ផលិតផលឱសថ WART REMOVER OINTMENT គ្មានលេខបញ្ចិកានិងគ្មានច្បាប់អនុញ្ញាតឲ្យផ្សព្វផ្សាយពីក្រសួងសុខាភិបាលឡើយ គិតត្រឹមថ្ងៃទី ២១ ខែឧសភា ឆ្នាំ២០២១។

អនុលោមតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ស្ដីពីការគ្រប់គ្រងឱសថ តម្រូវឱ្យរាល់ការចរាចរឱសថ ឬផលិតផលបំប៉នសុខភាពគ្រប់ប្រភេទក្នុងព្រះរាជាណាចក្រកម្ពុជា ត្រូវមានលេខទិដ្ឋាការ ឬបញ្ចិកា ពីក្រសួងសុខាភិបាល ហើយរាល់ការផ្សព្វផ្សាយផលិតផលទាំងនេះត្រូវមានការអនុញ្ញាតពីក្រសួងសុខាភិបាល ដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាពអ្នកប្រើប្រាស់ទៀតនោះ។

ក្រសួងសុខាភិបាលបានប្រកាសដល់ប្រជាពលរដ្ឋទាំងអស់ ត្រូវបញ្ឈប់ការប្រើប្រាស់ផលិតផល ឱសថ WART REMOVER OINTMENTគ្មានលេខបញ្ចិកា ពីក្រសួងសុខាភិបាលខាងលើ ព្រោះផលិតផលនេះមិនអាចធានាបាននូវគុណភាពនិងសុវត្ថិភាពឡើយ។

ក្រសួងសុខាភិបាលព្រមានថានឹងមានចាត់វិធានការតឹងរ៉ឹងទៅតាមផ្លូវច្បាប់ ចំពោះម្ចាស់គណនីហ្វេសប៊ុកខាងលើ ដែលផ្សព្វផ្សាយលក់ផលិតផលឱសថ WART REMOVER OINTMENT ទៅតាមច្បាប់ស្តីពីច្បាប់វិសោធនកម្មច្បាប់ស្តីពីការគ្រប់គ្រងឱសថជាធរមាន។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាល កាលពីថ្ងៃទី៣១ ខែឧសភា ឆ្នាំ២០២១៕